Mazkur yig‘ilishda Qoraqalpog‘iston Respublikasi Ichki ishlar vazirining o‘rinbosarlari, sohaviy xizmat rahbarlari, tuman va shahar ichki ishlar organlari boshliqlari hamda barcha shaxsiy tarkib ishtirok etdi.

Tadbir avvalida Qoraqalpog‘iston Respublikasi ichki ishlar vazirining 1-o‘rinbosari polkovnik Jasur Atayev tomonidan 2024 yil davomida Qoraqalpog‘iston Respublikasida huquqbuzarlik va jinoyatlarni barvaqt oldini olish, sodir bo‘lgan jinoyatlarni issiq izida fosh etish, jamoat tartibi va fuqarolar xavfsizligi hamda yo‘l harakati xavfsizligini taʼminlash borasida amalga oshirilgan ishlar hamda yo‘l qo‘yilgan kamchiliklar yuzasidan batafsil Axborot berildi.

2024 yil davomida erishilgan yutuqlar, yo‘l qo‘yilgan kamchiliklar hamda o‘tkazilgan profilaktik tadbirlarning samaradorligi xususida sohaviy xizmat rahbarlari, tuman (shahar) IIB boshliqlari va boshqa masʼullarning ham hisobotlari tinglandi.

Hisobotlar tinglanib, muhokama natijalariga ko‘ra xizmat vazifalarini bajarishda kamchiliklarga yo‘l qo‘yib kelgan ayrim rahbar va xodimlarga nisbatan tegishli taʼsir choralari qo‘llanildi.

Shundan so‘ng 2025 yilda – Qoraqalpog‘iston Respublikasida jinoyatchilikning barvaqt oldini olishga qaratilgan yangi loyihalar, kuch vositalar, moddiy-texnik bazani yaxshilash bo‘yicha qilingan takliflar muhokama qilindi. Ichki ishlar vazirining o‘rinbosari bildirilgan taklif hamda mulohazalarga nisbatan o‘zining tavsiyalarini berib, yo‘l qo‘yilgan kamchiliklardan kerakli xulosa chiqarib, berilgan vazifa va topshiriqlarni vijdonan bajarish, fuqarolar xavfsizligi hamda huquqbuzarlik va jinoyatlarni barvaqt oldini olish bo‘yicha topshiriqlar berdi.

Birinchi navbatda har bir ichki ishlar organi xodimining o‘zi xizmat intizomi va qonunchilikka qatʼiy amal qilishi, xizmat vazifasiga vijdonan yondashishi, asosiysi vatanga, xizmatga va xalqiga sadoqatli bo‘lishi lozimligini yana bir bor taʼkidlab o‘tdi.

Vazir o‘rinbosari, yuqori va quyi tizim rahbarlariga, xodimlarning oilaviy sharoiti va ularni har tomonlama qo‘llab-quvvatlash, yosh kadrlarni tarbiyalashda ustoz-murabbiy anʼanalarini yana-da keng tatbiq etishga alohida eʼtibor qaratish zarurligini bildirdi.

2025 yilda Qoraqalpog‘iston Respublikasida ichki ishlar organlari tomonidan amalga oshirilishi rejalashtirilgan ishlar yuzasidan ishlab chiqilgan tashkiliy tadbirlar rejasi va yo‘l xaritalarini yana bir bor sinchkovlik bilan ko‘rib chiqib, har bir yo‘nalish bo‘yicha barcha ustuvor vazifalarni belgilab olgan holda ijroga qaratish lozimligi yuzasidan qarorlar qabul qilindi.

Yig‘ilish yakunida 2024 yil davomida xizmatdoshlariga shaxsiy namuna ko‘rsatib yuqori ko‘rsatgichlarga erishgan, maʼmuriy hududida huquqbuzarlik va jinoyatlarni barvaqt oldini olish borasidagi profilaktik tadbirlarda samarali mehnat qilgan, sodir etilgan jinoyatlarni aniqlash va issiq izida fosh etish borasida yuqori natijalarga erishgan bir guruh ichki ishlar organlari xodimlari va ularning ota-onalari O‘zbekiston Respublikasi Ichki ishlar vaziri o‘rinbosarining faxriy yorlig‘i va pul mukofotlari bilan taqdirlandi.
Qoraqalpog‘iston Respublikasi IIV Axborot xizmati