8 mart - Xalqaro xotin-qizlar kuni munosabati bilan Qoraqalpog‘iston Respublikasi Ichki ishlar vazirligida bayram tadbiri bo‘lib o‘tdi.
Xalqimiz ayollarni uyg‘onish va yasharish fasli bo‘lgan bahorga qiyoslaydi. 8 mart - Xalqaro xotin-qizlar kuni bayramining ham ushbu mavsumning ilk kunlarida nishonlanishida ham ana shunday hikmat mujassam, desak adashmaymiz. Bugungi kunda xotin-qizlarimiz xalq xo‘jaligining deyarli barcha sohalarida samarali xizmat qilmoqda. Hatto ular el tinchligi yo‘lida ham o‘z faolligi bilan ko‘zga tashlanmoqda. 8 mart Xalqaro xotin-qizlar kuni munosabati bilan Qoraqalpog‘iston Respublikasi Ichki ishlar vazirligida bayram tadbiri o‘tkazildi. Unda Qoraqalpog‘iston Respublikasi Ichki ishlar vaziri so‘zga chiqib, yig‘ilgan xotin-qizlarni bayram bilan tabrikladi. Ta’kidlanganidek, mamlakatimizda xotin-qizlar uchun ko‘plab imkoniyatlar yaratib berilgan, ular qaysi sohada bo‘lmasin o‘zlarining mehnatsevarligi, talabchanligi tufayli erkaklar bilan teng qadam tashlab xizmat qilib kelmoqda. Tantanali tadbirda O‘zbekiston Respublikasi Ichki ishlar vazirlarining maxsus buyruqlari bilan bir guruh xotin-qizlarga ko‘krak nishonlari, maxsus unvonlar, esdalik sovg‘alari topshirildi. Shu bilan birga vazirlik tizimida xizmat qilayotgan xotin-qizlar o‘rtasida o‘tkazilgan sport musobaqalari g‘oliblari, ta’lim muassasalari o‘qituvchilari ham munosib taqdirlandi. Bayram kechasi vazirlikning Orol yulduzlari ansamblining qiziqarli sahna ko‘rinishlari, madaniyat va san’at xodimlarining konsert dasturi bilan davom etdi.
