8-mart - Xalıqaralıq hayal-qızlar kúni múnásibeti menen Qaraqalpaqstan Respublikası Ishki isler ministrliginde bayram ilajı bolıp ótti.
Xalqımız hayal-qızlardı oyanıw hám jasarıw pasılı bolǵan báhárge teńeydi. 8-mart - xalıq aralıq hayal-qızlar kúni bayramınıń da usı máwsimniń dáslepki kúnlerinde belgileniwinde de mine, usınday hikmet jámlengen, desek aljaspaymız. Búgingi kúnde hayal-qızlarımız xalıq xojalıǵınıń derlik barlıq tarawlarında jemisli xızmet etpekte. Hátteki olar еl tınıshlıǵı jolında da óz belsendiligi menen kózge taslanbaqta. 8-mart - Xalıqaralıq hayal-qızlar kúni múnásibeti menen Qaraqalpaqstan Respublikası Ishki isler ministrliginde bayram ilajı bolıp ótti. Onda Qaraqalpaqstan Respublikası Ishki isler ministri shıǵıp sóylep, jıynalǵan hayal-qızlardı bayram menen qutlıqladı. Atap ótilgenindey, mámleketimizde hayal-qızlar ushın kóplegen imkaniyatlar jaratıp berilgen, olar qaysı tarawda bolmasın ózleriniń miynet súygishligi, talapshańlıǵı sebepli er adamlar menen teń qádem taslap xızmet etip kelmekte. Saltanatlı ilajda Ózbekstan Respublikası Ishki isler ministrleriniń arnawlı buyrıqları menen bir topar hayal-qızlarǵa kókirek belgileri, arnawlı ataqlar, estelik sawǵaları tapsırıldı. Sonıń menen birge, ministrlik sistemasında xızmet etip atırǵan hayal-qızlar arasında ótkerilgen sport jarıslarınıń jeńimpazları, bilimlendiriw mákemeleriniń muǵallimleri de múnásip sıylıqlandı. Bayram keshesi ministrliktiń Aral juldızları ansambliniń qızıqlı saxnalıq kórinisleri, mádeniyat hám kórkem óner xızmetkerleriniń koncert baǵdarlaması menen dawam etti.
