Ózbekstan Respublikası Ishki isler ministrligi janındaǵı Tergew departamentiniń 2024-jıl 8-avgust kungi kórsetpesi talapların orınlaw maqsetinde usı jıldıń 16-avgust kúni Qaraqalpaqstan Respublikası Ishki isler ministri orınbasarı polkovnik Muzaffar Raxmatullaevtıń basshılıǵında prokuratura, sud organları hám Ózbekstan Respublikası Ádillik ministrligi janındaǵı “Xadicha Sulaymanova” atındaǵı sud ekspertiza orayınıń Qaraqalpaqstan Respublikası bólimi menen birgelikte videokonferenciya usılında oqıw-seminarı shólkemlestirildi.

Oǵan Qaraqalpaqstan Respublikası IIM janındaǵı Tergew basqarması hám onıń orınlardaǵı bólimshelerinde xızmet etip kiyatırǵan tergewshi hám sorastırıwshılar, sonday-aq, Qaraqalpaqstan Respublikası prokuraturası bólim baslıǵı, jınayat isleri boyınsha Nókis qalası sudı baslıǵı hám Ózbekstan Respublikası Adillik ministrligi janındaǵı “X.Sulaymanova” atındaǵı sud ekspertiza orayınıń Qaraqalpaqstan Respublikası bólimi aǵa ekspertleri qatnastı. Oqıw-seminarı dawamında, aqlaw húkimi shıǵarılǵan jınayat isleri, sudlar tárepinen Jınayat-processual kodeksiniń 416-417-statyasına tártibinde shıǵarılǵan uyǵarıwlar, prokuratura tárepinen jınayat isleriniń qosımsha tekseriwge qaytarılıwı, sudlardıń ayırıqsha uyǵarıwları, prokuratura organlarınıń usınısları hám intizamiy is qozǵatıw haqqındaǵı qararları dodalandı. Bunnan tısqarı, tergewshi hám sorastırıwshılar tárepinen tergewge shekemgi tekseriw, sorastırıw hám dáslepki tergew dawamında jol qoyılıp atırǵan qáte-kemshilikler qatań sınǵa alınıp, bunday jaǵdaylardı keleshekte tákirarlamaw hám saplastırıw boyınsha zárúr is-ilájlar belgilep alındı.

Sonday-aq, oqıw-seminarı qatnasıwshıları ózileriniń qızıqtırǵan sorawlarına juwap alıp, óz pikir hám usınısların bildirdi.