Jumladan, yaqinda hibsxonaga O‘zbekiston Respublikasi Advokatlar palatasi Qoraqalpog‘iston Respublikasi hududiy boshqarmasi masʼullari A.Ametov va F.Romanovlar taklif etilib, xodimlar bilan O‘zbekiston Respublikasining 29.09.2011 yilgi O‘RQ-298-son “Jinoyat ishini yuritish chog‘ida qamoqda saqlash to‘g‘risida”gi Qonunining mazmun-mohiyati va boshqa qonunchilikdagi o‘zgartirish va qo‘shimchalar haqida o‘quv mashg‘uloti o‘tkazildi. Yig‘ilishda, ushbu Qonunning vazifalari jinoyat sodir etganlikda gumon qilinib ushlab turilgan shaxslarni va o‘ziga nisbatan qamoqqa olish tarzidagi ehtiyot chorasi qo‘llanilgan shaxslarni qamoqda saqlash tartibi hamda shart-sharoitlarini, ularning huquqlari, erkinliklari va qonuniy manfaatlari kafolatlarini belgilashdan iborat. Shuningdek, jamiyat taraqqiyoti – qonun ustuvorligi va sud hokimiyatining mustaqilligi bilan chambarchas bog‘liq. So‘nggi yillarda sud-huquq sohasida amalga oshirilayotgan islohotlar mamlakatimizda inson qadrining yana-da yuksalishi, huquq va erkinliklari eng oliy darajada qadrlanishini taʼminlashga xizmat qilayotir.  Qamoqqa olish tarzidagi ehtiyot chorasini qo‘llash yoki qamoqda saqlash muddatini uzaytirish uchun sanksiya berish vakolatining sudlarga o‘tkazilishi bu boradagi dastlabki qadamlar bo‘lgan bo‘lsa, keyingi yillarda bu islohotlar yana-da jadallashdi.  Jinoyatni sodir etishda gumon qilingan shaxslarni ushlab turish muddati 72 soatdan 48 soatga, qamoqqa olish va uy qamog‘i tarzidagi ehtiyot choralarini qo‘llashning, shuningdek, dastlabki tergovning eng ko‘p muddati 1 yildan 7 oyga qisqartirildi.  Xususan, aholining odil sudlovga bo‘lgan ishonchini oshirish maqsadida “Xabeas korpus” instituti kengaytirilib, tergov ustidan sud nazorati yana-da kuchaytirildi. Bu kabi islohotlarning mantiqiy davomi sifatida yangilanayotgan Konstitutsiyada O‘zbekiston – huquqiy davlat deb eʼtirof etilib, inson huquqlariga oid normalar uch barobarga ko‘paymoqda. Yaʼni, fuqarolarning huquq va erkinliklarini ishonchli himoya qilish davlatning konstitutsiyaviy majburiyati sifatida qayd etilmoqda. Shular bilan birga, advokatlarning huquq va majburiyatlari, ichki ishlar organlari xodimlari bilan o‘zaro munosabatlari, hibsxonaga kirish-chiqishda xodim va advokatlarning majburiyatlari, advokatlar etika va estetikasi masalalarida ham keng turda ochiq muloqot va davra suhbatlari tashkil etildi. Mashg‘ulot davomida xodimlar o‘zlarining qiziqtirgan savollari bilan masʼullarga savollar bilan murojaat qilib, tegishli javoblarini olishdi