Yig‘ilishda Qoraqalpog‘iston Respublikasi Vazirlar Kengashi raisining o‘rinbosari Bayrambay O‘temuratov, Qoraqalpog‘iston Respublikasi Ichki ishlar vaziri polkovnik Baxtiyor Torebekov va Qoraqalpog‘iston Respublikasi Favqulodda vaziyatlar boshqarmasi boshlig‘i podpolkovnik Azamat Davletov, shuningdek tegishli soha vakillari ishtirok etdi. Unda asosan maktablarda so‘nggi qo‘ng‘iroq tadbirlarida xavfsizlik qoidalarini ta’minlash, har bir maktabga bu bo‘yicha tegishli xodimlarni taqsimlash masalalari muhokama qilindi. Shu bilan birga tadbirda o‘quvchilarning yozgi ta’tillarini mazmunli o‘tkazish uchun o‘z faoliyatini olib boradigan bolalar dam olish va sog‘lomlashtirish markazlarida xavfsizlik qoidalariga rioya qilinishini ta’minlash bo‘yicha ham tegishli mas’ullarga topshiriqlar berildi. Shuningdek, belgilanmagan, taqiqlangan joylarda cho‘milish holatlarining oldini olish, bu borada targ‘ibot va profilaktik reyd tadbirlarini muntazam o‘tkazish masalalariga ham e’tibor qaratildi. Yig‘ilishda muhokama qilingan masalalar yuzasidan tegishli mutasaddilarga vazifalar belgilab berildi.