3-sektor baslıǵı U.Sitmuratovtıń náwbettegi qabıllawı bolıp ótti
Elimizde insan qádir-qımbatı joqarı qádiriyat dárejesine kóterildi. Bárshe mámleketlik shólkemlerde xalıq penen islesiw, puqaralardıń múrájat hám mashqalaların úyreniwdiń jańasha mexanizmi jaratıldı. Sektor bsshıları tárepinen kóshpeli qabıllawlar shólkemlestirilip, puqaralardıń mashqalaları tıńlanbaqta hám olardı saplastırıw boyınsha úlken jumıslar ámelge asırılıp atırǵanlıǵı hesh kimge sır emes.
Áyne, usınday kóshpeli qabıllawlardıń biri búgin rayonımızdıń shetki aymaqlarınıń biri sanalǵan “Ráwshan” awıl puqaralar jıyınında bolıp ótti. Onda rayonlıq 3-sektor baslıǵı U.Sitmuratov, Jaslar isleri agentligi rayonlıq bólimi baslıǵı T.Qazaqbaevlar tiyisli taraw basshıları menen birgelikte aymaq turǵınlarınıń múrájatların tıńladı.
Kóshpeli qabıllaw dawamında aymaq turǵınları kommunal xızmetlerdiń sapasın jaqsılaw, ishki jollardı rekonstrukciya qılıw, isbilermenlik jumısların baslaw ushın kreditler ajıratıw hám xalıq bántligin támiyinlew sıyaqlı bir qansha máseleler boyınsha rayon hákimine múrájat etti. Ayırım múrájatlardı sol orınnıń ózinde saplastırıw ilajları kórilgen bolsa, úyreniliwi ushın waqıt talap etiletuǵın múrájatlar boyınsha taraw basshılarına anıq tapsırmalar berildi.
