Qaysı qániygelik yamasa kásipti alıp qarasań da ustazdan tálim-tárbiya almaǵan, kásiptiń ózine tán sırların olardan úyrenbegen shákirt yaki qániyge bolmasa kerek. Sebebi, uzaq jıllıq tájiriybege iye jası úlkenlerdiń ómir hám xızmet jolı keyingi áwlad ushın tariyx. Sol tariyxtı qásterlep-abaylaw, olardı húrmet etiw bolsa biziń wazıypamız hám minnetimiz sanaladı.
Qaraqalpaqstan Respublikası ishki isler organları qatarında uzaq jıllar dawamında jınayatshılıqqa qarsı gúresiw, huqıqbuzarlıqtıń aldın alıw, jámiyetlik tártipti saqlawday ádiwli wazıypasın pidáyı hám hadal atqarǵan, nátiyjede mámleketlik sıylıqlarǵa múnásip bolǵan general, polkovnik hám podpolkovnik shenindegi jası úlken xızmetkerler, húrmetli veteranlar kópshilikti quraydı.
Hár bir bayram, yamasa belgili sáneler qarsańında olardıń hal-jaǵdayınan xabar alıw, arnawlı sawǵalardı tapsırıw ilajları da turaqlı túrde shólkemlestirilip kelinbekte. Álbette, bul olardıń shákirtleriniń insanıylıq parızı desek qáte bolmasa kerek.
Búgingi Muǵallimler hám ustazlar kúni bayramına tiyisli saltanatlı ilajlar respublikamız boylap joqarı kóterińkilik ruwxında hár bir orında ótkerilip atır. Kópshilik ustazlar usı bayram múnásibeti hám pidákerlik miynetleri arqasında mámleketlik sıylıqlarǵa erispekte. Bul da húkimetimiz hám respublikamız basshılarınıń ádiwli ustazlar hám olardıń pidákerlik miynetlerine bolǵan joqarı húrmeti.
Óz gezeginde, tarawımız ustazların, jası úlken veteranlarımızdı búgingi bayram menen ózimniń hámde ishki isler ministrligi xızmetkerleri atınan qızǵın qutlıqlayman, jas awladtı tárbiyalawday juwapkerli jumıslarında tasqın tabıslar tileymen.

A. J. TEMIRXANOV,
Qaraqalpaqstan Respublikası Ishki isler ministri, polkovnik.