Dáslepki mánzil Nókis qalasındaǵı Allaniyaz Qaharman máhállesinde ámelge asırılıp atırǵan infrastrukturalıq joybarlar hám bar sharayatlar ornında kózden ótkerildi. Úyreniw procesinde piyadalar hám transport qurallarınıń háreketi qáwipsizligin arttırıw, svetofor hám jol belgilerin jańalaw, piyadalar ótiw orınların anıq belgilew sıyaqlı máseleler dodalandı. Sonday-aq, sapar dawamında Ámiwdárya rayonı aymaǵında puqaralar ushın ámelge asırılıp atırǵan infrastruktura jumısları da kózden ótkerildi. Qaraózek rayonı aymaǵınan ótiwshi A-380 avtomobil jolınıń 753-kilometrinde bolsa sınaq túrinde ornatılǵan, awır salmaqlı júk tasıwshı transport qurallarınıń kólem hám salmaq parametrlerin avtomatlastırılǵan tárizde qadaǵalawshı elektron tárezi punkti menen tanıstı. Bul sistema júk artıqshalıǵın anıqlaw, jol qaplamasın saqlaw hám háreket qáwipsizligin támiyinlewde ayrıqsha áhmietke ie. JPX basshıları máhálle jetiligi menen ushırasıp, puqaralardıń múrájatların tıńladı hám orınlarǵa shıǵıp mashqalalardı tikkeley úyrendi. Bar kemshiliklerdi ornında saplastırıwǵa qaratılǵan háreketler - puqaralardıń qáwipsizligin arttırıw, olardıń kúndelikli turmısın qolaylı etiw jolında qoyılǵan áhmietli qádem boldı. Bul sapar etiw hám úyreniwler, tek ǵana bar mashqalalardı sheshiwge emes, al keleshekte jol háreketi qáwipsizligin jáne de bekkemlewge xızmet etedi.