Ózbekstan Respublikası Prezidentiniń 2023-jıl 7-fevral kúngi “Ózbekstanda insan huqıqları tarawındaǵı milliy bilimlendiriw baǵlarlamasın tastıyıqlaw haqqında”ǵı PQ-46-sanlı qararına muwapıq, usı jıldıń 20-28-fevral kúnleri “Insan huqıqları hápteligi” ótkeriliwi belgilendi.

Usı qararǵa muwapıq, Jaslar isleri agentligi, sudlar, prokuratura, Ádillik ministrligi hám basqa birge islesiwshi mekeme, shólkemler menen birge orınlarda “Insan huqıqları – joqarı qádriyat” atamasında sudya hám jaslar ushırasıwları, “Jańa Ózbekstan hám insan huqıqları” atamasında “Informaciya saatı” hám “Aǵartıwshılıq saatı” ilajları ótkerilmekte.

Náwbettegi ushırasıw Shımbay rayonı pedagogika kollejinde ótkerildi.

Ushırasıwda jınayat isleri boyınsha Shımbay rayonı sudınıń baslıǵı A.Xojanov, Shımbay rayonlar aralıq ekonomikalıq sudınıń sudyası N.Baltabaeva, Shımbay rayonı IIB JQX HPB jas óspirimler máseleleri boyınsha inspektor psixolog kapitan B.Baymuratov hám  Shımbay rayonı IIB JQX HPB jas óspirimler máseleleri boyınsha inspektor psixolog leytenant A.Joldasbaev, Jaslar isleri agentligi Shımbay rayonı bólimi baslıǵı R.Babanazarov elimizde insan huqıqların támiyinlew baǵdarında ámelge asırılıp atırǵan jumıslar haqqında sóz etti.

Atap ótilgenindey, Ózbekstanda insan huqıqların támiyinlew, qorǵaw hám oǵan boysınıw máseleleri mámleketlik siyasattıń áhmiyetli baǵlarlarınan esaplanadı. Insan huqıqları boyınsha Ózbekstan Respublikasınıń Milliy strategiyası sheńberinde jeke, siyasiy, ekonomikalıq, sociallıq hám mádeniy huqıqlardı támiyinlew boyınsha maqsetli ilajlar ámelge asırılmaqta.

2020-2024-jıllarda insan huqıqları tarawındaǵı Jáhan bilimlendiriw baǵdarlamasınıń tórtinshi basqıshı ámelge asırılmaqta. Usı basqısh jaslardı teńlik, insan huqıqlarına ámel etiw hám kemsitpew ruwxında tárbiyalaw hám inklyuziv, tınısh jámiyetti jaratıwǵa múmkinshilik beriwshi bilim beriwge qaratılǵan.

Atap ótilgen Prezident qararı tiykarında Milliy bilimlendiriw baǵdarlaması hám onı ámelge asırıw boyınsha “Jol karta” tastıyıqlandı.

Bunnan maqset – BMShtıń Insan huqıqları tarawında bilimlendiriw hám tárbiya haqqındaǵı Deklaraciyasınıń qaǵıydaları hám insan huqıqları tarawındaǵı Jáxan bilimlendiriw baǵdarlamasınıń tórtinshi basqıshın ámelge asırıw, sonday-aq bul haqqında xalıqtı xabardar etiwden ibarat.

Ushırasıw qızǵın dawam etip, ilaj qatnasıwshıları taraw wákillerinen insan huqıqların isenimli qorǵaw hám sud-huqıq tarawı menen baylanıslı ózlerin qızıqtırǵan sorawlarına juwaplar aldı.

Jınayat isleri boyınsha

Shımbay rayonı sudınıń baslıǵı          A.Xojanov