Ishki isler ministri tiykarınan sociallıq qorǵawǵa mútáj, kem támiynlengen, jumıssız hám probaciya esabında turǵan jaslar hám olardıń ata-anaları ózleriniń turmıslıq másele ham mashqalaları menen tanıstı. Ilajda kelgen jaslardıń kópshiligi bántligin támiynlew, densawlıǵın tiyklew boyınsha ámeliy járdem sorap múrájat etti. Ministr olardıń múrájatın tıńlar eken, eger qızıǵıwshılıǵı, qolında óneri bar bolsa olardıń ózin-ózi bánt etiwi ushın jeńilletilgen kreditler bar ekenligin túsindirip, onı alıwı ushın ámeliy járdem beretuǵınlıǵın bildirdi. Kópshilik jaslarǵa bul usınıs maqul kelip, olar usı jeńilletilgen kreditlerden paydalanıp, bántligin támiynlew ushın ózlerine kerekli áspab úskenelerdi alatuǵın boldı. Sonday-aq ministr densawlıǵı boyınsha járdem sorap  múrájat etken jaslar hám olardıń ata-analarına da ámeliy járdem beriletuǵınlıǵın bildirdi.

Ishki isler ministriniń rayonda ótkerilgen aldıńǵı qabıllawlarınıń birinde IT jónelisine qızıǵıwshılıǵı sebepli kompyuter soraǵan jastıń bul múrájatı unamlı sheshim taptı. Yaǵnıy ministr onıń shańaraǵına barıp, ol soraǵan kompyuter toplamın sawǵa etti. Sonday-aq sociallıq qorǵawǵa mútáj jaslardıń biri televizor sorap múrájat etken edi. Onıń shańaraǵına da soraǵan televizorı jetkerildi.

Álbette hár qanday múrájat unamlı sheshiliwi menen áhmiyetli sanaladı. Ásirese jaslar turmısında ushırasıp atırǵan másele hám mashqalalarǵa unamlı sheshim tabılıwı- olardıń erteńgi kúnge bolǵan isenimin ele de bekkemleydi. 

Qaraqalpaqstan Respublikası IIM Málimleme xızmeti