Xalqımız hár jılı asıǵıslıq penen kútetuǵın shıǵıs xalıqlarınıń jańa jıl bası bolǵan Nawrız bıyıl da ana diyarımızǵa qutlı qádemin qoydı. Tábiyat jańalanıwınıń nıshanı, jańa kún elshisi bolǵan ulıstıń ullı kúni Respublikamızdıń barlıq aymaqlarında keń túrde belgilenip, bayram tamashaları, xalıq seyilleri dawam etpekte. Qaraqalpaqstan Respublikası Ishki isler ministrligi jámááti de Nawrız ulıwmaxalıqlıq bayramın kóterińki ruxta belgilep ótti. «Hár kúniń Nawrız bolsın, janajan Ózbekstanım» súreni menen shólkemlestirilgen bayram ilajında Qaraqalpaqstan Respublikası Ishki isler ministri polkovnik Baxtiyar Tórebekov sózge shıǵıp, jıynalǵanlardı shıǵıs xalıqlarınıń jıl bası bolǵan Nawrız ulıwma xalıqlıq bayramı menen qutlıqladı. Bunnan soń ministrliktiń Aral juldızları ansambili tárepinen tayarlanǵan milliylikti sáwlelendiriwshi teatrlastırılǵan bayram tamashaları hám koncert baǵdarlaması usınıldı. Nawrız bayramı milliy sport oyınların ózinde jámlegenligi menen de áhmiyetli sanaladı. Sol sıyaqlı bayram ilajında ministrlik xızmetkerleri arasında arqan tartıs, tas kóteriw boyınsha jarıslar ótkerildi. Álbette har qanday jarısta jeńimpazlar bolǵanında ótkerilgen jarısta da jeńimpazlar anıqlanıp, olar múnásip túrde sıylıqlandı. Sonday-aq bir qatar xızmetkerlerge Nawrız bayramı múnásibeti menen Ózbekstan Respublikası Ishki isler ministrliginiń estelik belgileri tapsırıldı. 
Bayramı ilajı sońında jıynalǵanlar ministrlik jámááti tárepinen jaqsı niyetler menen tas qazanlarda qaynatılǵan súmelekten dám tattı. Bunnan soń ilaj qatnasıwshılar bayram dástúrxanına mirát etildi.
Qaraqalpaqstan Respublikası IIM Málimleme xızmeti.