Ózbekstan Respublikası Ishki isler ministriniń 2023-jıl 11-aprel kúngi 100-sanlı biyligine tiykarlanıp, Ishki isler organlarında usı jıldıń 1-may sánesinen 31-may kúnleri aralıǵında «Watanǵa hám xalıqqa sadıqlıq penen xızmet etiw- ullı minnetimiz» súreni menen «Mánawiyat aylıǵı» ótkerilmekte. Aylıq sheńberinde, sonday-aq 1-iyun Xalıq aralıq balalardıń huqıqların qorǵaw kúni múnásibeti menen Qaraqalpaqstan Respublikası Ishki isler ministrligi xızmetkerleri hám olardıń shańaraq aǵzaları arasında «Ákem, anam hám men sportshılar shańaraǵı» atamasında sport jarısı ótkerildi. Jarısqa Qaraqalpaqtan Respublikası Ishki isler ministrligi, qala hám rayonlıq Ishki isler bólimlerinen xızmetkerler óz shańaraq aǵzaları menen qatnastı. Jarıstıń birinshi shárti Toptı basqarıw dep atalıp, onda qatnasıwshılar arnawlı qoyılǵan tosıqlardan ayaq hám qol menen aylanıp ótip, belgilengen aralıqtan toptı dárwazaǵa kirgiziwi kerek boladı. Ekinshi shártte qatnasıwshılar ózleriniń mergenlik qábiletin sınaqtan ótkerdi, yaǵnıy darts boyınsha bellesti. Úshinshi Jeńil atletika estafetası shártinde qatnasıwshılar ózleriniń qánsheli tez juwıratuǵınlıǵın kórsetken bolsa, Tórtinshi shártte fizikalıq imkaniyatı menen shaqqan hám epshiligin kórsetiwge háreket etti. Besinshi shárt Arqan tartısıw. Bul shártte oǵada qızıqlı ótkerildi. Qatnasıwshılar óz shańaraǵınıń abırayı ushın bar kúshi menen qarsılas shańaraqtı jeńiw ushın háreket etti. Oǵada qızıqlı bellesiwler, umıtılmas máwritlerge bay bolǵan jarıs juwmaǵında 3-orındı Tórtkúl rayonı Ishki isler bólimi atınan qatnasqan Babajanovlar shańaraǵı, 2-orındı Qaraózek rayonı Ishki isler bóliminen Zarlıkovlar shańaraǵı iyeledi. Sıylı birinshi orındı Taxtakópir rayonı Ishki isler bóliminen qatnasqan Imalatdinovlar shańaraǵı jeńip aldı. Jeńimpaz hám belsene qatnasıwshılar shólkemlestiriwshiler tárepinen diplom hám estelik sawǵaları menen sıylıqlandı.

 Qaraqalpaqstan Respublikası IIM Málimleme xızmeti