Qaraqalpaqstan Respublikası Ishki isler ministri, polkovnik Baxtıyar Tórebekovtıń joqarı oqıw orınlarında studentler menen ushırasıwı ótkerilmekte.
Jaslar tárbiyası búgingi kúnde eń tiykarǵı máseleler qatarınan orın alǵan. Ásirese joqarı oqıw orınlarında bilim alıp atırǵan student jaslardıń tálim-tárbiyasında jol qoyılıp atırǵan qate kemshiliklerdi saplastırıw, ishki isler organları xızmetkerleri hám oqıw orınları jámáátiniń birge tıǵız islesiwin ele de kúsheytiw maqsetinde Qaraqalpaqstan Respublikası Ishki isler ministri, polkovnik Baxtıyar Tórebekovtıń joqarı oqıw orınlarında studentler menen ushırasıwı ótkerilmekte. Náubettegi mine usınday ushırasıw Qaraqalpaqstan awıl xojalıǵı hám agrotexnologiyalar institutında shólkemlestirildi. Professor-oqıtıwshılar, student jaslar qatnasıwında ótkerilgen ilajda jaslardıń sanasında boslıqtı payda etpew hám olardı sergeklikke shaqırıwda kóbirek nelerge áhmiyet beriw kerekligi boyınsha sóz etildi. Sonday-aq ushırasıwda ayırım joqarı oqıw orınları studentleri qatnasıwında júz berip atırǵan hár túrdegi huqıqbuzarlıq hám jınayatlar haqqında da maǵlıwmatlar berilip, bunday jaǵdaylardıń aldın alıw boyınsha oqıw ornı, profilaktika inspektorları hám basqa da baylanıslı shólkemlerdiń birge islesiwin ele de kúshetiw kerek ekenligi atap ótildi. Sonıń menen birge ijarada turıp oqıp atırǵan studentlerdiń de jasaw orınların turaqlı túrde úyreniw, olardıń ushırasıp atırǵan mashqalaların úyrenip, ilajı barınsha sheship beriw boyınsha tiyisli xızmetkerlerge tapsırmalar berildi.
