Usı jıldıń 15-mart kúni Qanlıkól rayonında jasawshı 1982-jıl tuwılǵan O.A atlı puqaranıń 2010-jıl tuwılǵan Z.A atlı jas óspirim balası keshki saat 20:00den baslap úyine kelmegenlikten kóshege izlep shıqqan. 

Saat 21:00 lerge jaqın Qanlıkól rayonı Doslıq kóshesi boyında Qanlıkól rayonında jasawshı 1995-jıl tuwılǵan A.J atlı puqara óziniń úyinen shıǵıp 20:30 lar shamasında Gazonǵa futbol oynawǵa shıǵıp atırıp úyiniń aldında iytlerdiń úrip bir balanıń «járdem beriń» dep baqırıp turǵanlıǵın kórip, qasına barıp ne bolganlıǵın soraǵan. Jas óspirim bala eki puqara Damas avtomashinasında usı jerge alıp kelip arqasına urıp, óltiremen dep pıshaq tirep, awzına kómir tıqqanlıǵın aytqan hám jas óspirimnen qayjerde turatuǵınlıǵın sorap, 1995-jıl tuwılǵan puqara A.J jas óspirimdi ata-anasına alıp kelip tapsırǵan. 

Usı waqıyadan xabar tapqan puqara O.A nıń jeńgesi Qanlıkól rayonında jasawshı R.U atlı puqara ózniń «telegramm» sociallıq tarmaǵı arqalı audio dawısqa túsip «Tuwısqanlar» toparına jibergenligi anıqlanǵan. 

Sorastırıw jumısları dawamında Z.A atlı jas óspirimniń ata-analarınıń aytıwınsha balası bos waqıtları qol telefonda  «RUBG MOBILE» mobil oyının turaqlı túrde oynap kiyatırǵanlıǵın, usı oyınnıń tásirine túsip qalǵan bolıwı múmkinligin bildirgen. 

Bul waqıya boyınsha Qanlıkól rayonı XBB-ne qaraslı Kániygelestirilgen mekteptiń Psixolog kániygesi O.A nıń dáslepki awız eke túrdegi psixologiyalıq juwmaǵında Z.A atlı jas óspirimniń usı joqardaǵı aytıp ótken waqıyaları haqıyqatqa tuwrı kelmeytuǵınlıǵın bildirip ótken.

 Házirgi waqıtta waqıyaǵa aydınlıq kiritiw maqsetinde jas óspirim Z.A hám onıń ata-anası A.O hám T. A jaqın tuwısqanları, mektep oqıwshı hám oqıtıwshıları arasında sorastırıw jumısları alıp barılmaqta.

Qaraqalpaqstan Respublikası IIM Málimleme xızmeti