Ózbekstan Respublikası Ishki isler ministriniń usı jıl 11-aprel kúngi tiyisli biyligine tiykarlanıp, Ishki isler organlarında usı jıldıń 1-31-may kúnleri aralıǵında «Watanǵa hám xalıqqa sadıqlıq penen xızmet etiw – baslı minnetimiz!» súreni astında «Ruwxıylıq aylıǵı» ótkerildi.
Usı aylıq sheńberinde Qaraqalpaqstan Respublikası Ishki isler ministrligi Ruwxıy-aǵartıwshılıq jumıslar hám kadrlar menen támiyinlew xızmeti tárepinen bir qatar ilajlar ámelge asırıldı.
30-may kúni usı ótkerilgen bir aylıq sheńberinde Qaraqalpaqstan Respublikası Ishki isler organlarınıń xızmetkerleri arasında «Zakovat» intellektuallıq oyını joqarı dárejede shólkemlestirildi. Oǵan ministrliktiń barlıq basqarma, bólim, qalalıq hám rayon Ishki isler bólimleriniń jeke quramınan dúzilgen jámi 20 komanda qatnastı.
Oyın dawamında komandalar sorawlarǵa, belgilengen waqıt aralıǵında anıq hám durıs juwap beriwge háreket etti. «Zakovat» xızmetkerlerdiń intellektuallıq bilimlerin sınawdan ótkeriwge jáne bir imkan jarattı.
Álbette hár qanday tańlaw, yamasa jarısta kúshliler anıqlanadı. Sol sıyaqlı «Zakovat» oyınında da óz qarsılaslarınan bilim dárejesiniń joqarı ekenligin kórsetiwge háreket etken komandalar jeńimpaz dep tabıldı.
Intellektuallıq oyın nátiyjesinde Kegeyli rayonı IIBniń xızmetkerlerinen dúzilgen komanda 3-orındı, QR IIM JQXnıń Jámiyetlik tártipti saqlaw basqarmasınan dúzilgen komanda 2-orındı hám Qońırat rayonı IIBniń komandası sıylı 1-orındı iyelep, jeńimpazǵa aylandı.
Jeńimpazlarǵa diplom hám aqshalay sıylıqlar tapsırıldı. Sonday-aq, belsene qatnasqan qatnasıwshılar bir qatar nominaciyalarda jeńimpaz dep tabılıp, olarǵa ministrliktiń «Húrmet jarlıǵı» tapsırıldı.
