Қорақалпоғистон Республикаси Вазирлар Кенгашида киберхавфсизлик, интернетдаги фирибгарлик йўли билан пластик карталардан пул маблағларини ечиб олиш ҳолатлари билан боғлиқ жиноятларнинг олдини олиш бўйича амалга оширилиши лозим бўлган ишлар бўйича соҳа вакиллари билан кенгайтирилган йиғилиш бўлиб ўтди. Йиғилишни Вазирлар Кенгаши Раиси Фарҳод Эрманов олиб борди. Президентимизнинг 2021 йил 29 ноябрдаги "Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида"ги Фармони ҳамда 2022 йил 3 февралдаги "Интернет тармоғида содир этилаётган ҳуқуқбузарликларнинг барвақт олдини олишга доир қўшимча чора-тадбирлар тўғрисида"ги қарори қабул қилинган. Мазкур Фармон ва Қарор ижросини таъминлаш мақсадида, Вазирлар Кенгашининг тегишли қарор ва фармойишлари қабул қилиниб, манфаатдор вазирлик, идора ва ташкилотларга Интернет тармоғида содир бўлаётган ҳуқуқбузарликларнинг барвақт олдини олиш бўйича топшириқлар берилган. Йиғилишда Қорақалпоғистон Республикаси Прокурори Эркабой Таджиев, Ички ишлар вазири Бахтияр Торебеков ва кун тартибидаги масалага алоқадор вазирлик, идора ва ташкилотлар раҳбарлари, шунингдек Нукус шаҳри ва туманлар студияларидан сектор раҳбарлари, тегишли идора, ташкилотлар раҳбарлари ва маҳалла еттилиги вакиллари иштирок этди. Тадбирда Қорақалпоғистон Республикаси Ички ишлар вазири Бахтияр Торебеков ва вазирликнинг Киберхавфсизлик бўлими бошлиғи томонидан интернет тармоғида содир бўлаётган ҳуқуқбузарликларнинг эрта олдини олиш бўйича амалга оширилиши лозим бўлган ишлар ҳақида маълумот берилди. Жумладан, аҳоли орасида, вазирлик, ташкилот ва корхоналарда, таълим муассасаларида, маҳаллаларда учрашувлар ўтказиб, эътиборни интернетдаги сохта ҳаволалар ва иловаларга қаратиш, жиноят қурбони бўлмаслик йўллари бўйича йиғилганларга тушунтириб ўтилди. Шунингдек, иштирокчиларга шахсий маълумотларни интернет тармоғида нотаниш шахсларга бериш оқибатида юзага келаётган ва бошқа жиноятларнинг оғир оқибатларидан хабардор қилишга қаратилган тушунтириш ишларини олиб бориш, ижтимоий тармоқлардаги расмий саҳифаларида эълон қилинаётган хабарларни аҳолининг барча қатламига етказиш борасидаги ишларни амалга ошириш бўйича йиғилиш иштирокчиларига тушунтиришлар берилди.