Qaraqalpaqstan Respublikası Ministrler Keńesinde kiberqáwipsizlik, internettegi aldawshılıq jolı menen plastik kartalardan pul qarjıların sheship alıw jaǵdayları menen baylanıslı jınayatlardıń aldın alıw boyınsha ámelge asırılıwı tiyis jumıslarǵa baǵıshlanıp taraw wákilleri menen keńeytilgen májilisi bolıp ótti. Májilisti Ministrler Keńesiniń Baslıǵı Farxod Ermanov basqarıp bardı. Prezidentimizdiń 2021-jıl 29-noyabrdegi “Ózbekstan Respublikası jámiyetlik qáwipsizlik koncepciyasın tastıyıqlaw hám onı ámelge asırıw ilajları haqqında”ǵı Pármanı hám 2022-jıl 3-fevraldaǵı “Internet tarmaǵında júz berip atırǵan huqıqbuzarlıqlardıń erte aldın alıwǵa baylanıslı qosımsha ilajlar haqqında”ǵı qararı qabıl etilgen. Usı Párman hám Qarar orınlanıwın támiyinlew maqsetinde, Ministrler Keńesiniń tiyisli qarar hám biylikleri qabıl etilip, mápdar ministrlikler, uyımlar hám shólkemlerge Internet tarmaǵında júz berip atırǵan huqıqbuzarlıqlardıń erte aldın alıw boyınsha tapsırmalar berilgen. Májiliste Qaraqalpaqstan Respublikası Prokurorı Erkaboy Tadjiev, Ishki isler ministri Baxtıyar Tórebekov hám kún tártibindegi máselege baylanıslı ministrlikler, uyımlar hám shólkemlerdiń basshıları, sonday-aq Nókis qalası hám rayonlar studiyalarınan sektor basshıları, tiyisli uyım, shólkemlerdiń basshıları hám máhálle jetiligi wákilleri qatnastı. Ilajda Qaraqalpaqstan Respublikası Ishki isler ministri Baxtıyar Tórebekov hám ministrliktiń Kiberqáwipsizlik bólimi baslıǵı tárepinen Internet tarmaǵında júz berip atırǵan huqıqbuzarlıqlardıń erte aldın alıw boyınsha ámelge asırılıwı tiyis jumıslar haqqında maǵlıwmat berildi. Sonıń ishinde, xalıq arasında, ministrlik, shólkem hám kárxanalarda, bilimlendiriw mákemelerinde, máhállelerde ushırasıwlar ótkerip, itibardı internettegi jalǵan siltemeler hám qosımshalarǵa qaratıw, jınayat qurbanı bolmaw jolları boyınsha jıynalǵanlarǵa túsindirip ótildi. Sonday aq qatnasıwshılarǵa jeke maǵlıwmatlardı internet tarmaǵında biytanıs shaxslarǵa beriw aqıbetinde júzege kelip atırǵan hám basqa da jınayatlardıń awır aqıbetlerinen xabardar etiwge qaratılǵan túsindiriw jumısların alıp barıw, sociallıq tarmaqlardaǵı rásmiy betlerinde járiyalanıp barılıp atırǵan xabarlardı xalıqtıń barlıq qatlamına jetkeriw baǵdarındaǵı jumıslardı ámelge asırıw boyınsha májilis qatnasıwshılarına túsinikler berildi.