Qaraqalpaqstan Respublikası Ishki isler ministrliginde Ózbekstan Respublikası Ishki isler ministriniń orınbasarı general-mayor Davron Nazarmuxammedovtıń qatnasıwında usı jıldıń 6 ayı dawamında ámelge asırılǵan jumıslar, jol qoyılǵan kemshiliklerdi dodalawǵa baǵıshlanǵan májilis ótkerildi. Ilajda Qaraqalpaqstan Respublikası Ishki isler ministri polkovnik Baxtiyar Torebekov, ishki isler ministriniń orınbasarları, barlıq tarawlıq xızmetlerdiń basshıları, qalalıq-rayonlıq ishki isler bólimleriniń baslıqları, olardıń orınbasarları, bólim baslıqları hám tiyisli juwapker xızmetkerler qatnastı. Májiliste Qaraqalpaqstan Respublikası Ishki isler ministriniń birinshi orınbasarı tárepinen ótken altı ay dawamında Qaraqalpaqstan Respublikasında jınayachılıqtı saplastırıw, huqıqbuzarlıqlarǵa qarsı gúresiw, jámietlik tártipti saqlaw, jol háreketi qáwipsizligin támiyinlew baǵdarında ámelge asırılǵan jumıslar boyınsha esabat berildi. Jınayachılıqtıń ayırım túrleri artqan aymaq juwapker basshılarına bul baǵdarda ámelge asırılıwı kerek bolǵan ilajlar boyınsha kórsetpe hám tapsırmalar berildi. Ilajda Ózbekstan Respublikası Ishki isler ministriniń orınbasarı shıǵıp sóylep, korrupciya hám dámegóylikke jol qoymaw, xızmet tártibi hám nızamshılıqqa ámel etiw boyınsha qatań talap hám tapsırmalardı jetkerdi. Ilaj sońında Qaraqalpaqstan Respublikası aymaǵında jámietlik tártipti saqlaw, puqaralardıń qáwipsizligin támiyinlew, jınayachılıqtı saplastırıwda óz kásipleslerine hár tárepleme úlgi bolıp kiyatırǵan bir topar xızmetkerlerge aqshalay sıylıqlar tapsırıldı.
Qaraqalpaqstan Respublikası IIM Málimleme xızmeti