Prezidentimizdiń usı jıl 3-yanvardaǵı qararında respublikamızdaǵı hár bir máhállede huqıqbuzarlıqlardıń erte aldın alıw tiykarǵı wazıypa etip belgilengen.

Qararda názerde tutılǵan ilajlardıń izbe-iz orınlanıwın támiyinlew maqsetinde Qaraqalpaqstan Respublikasındaǵı "máhálle jetiligi" sisteması wákilleri ushın kóshpeli shınıǵıwlar shólkemlestirildi.

IIM akademiyasınıń professor-oqıtıwshıları tárepinen mámleketimiz basshısınıń "2025-jılı respublika máhállelerinde qáwipsiz ortalıqtı jaratıw hám huqıqbuzarlıqlardıń erte aldın alıw sistemasınıń nátiyjeliligin bunnan bılay da arttırıw boyınsha ilajlar haqqında"ǵı qararınıń áhmietliligi, jańa sistema tiykarında jumıstı shólkemlestiriw mexanizmleri, aymaqlarda jınayachılıqtı saplastırıw hám huqıqbuzarlıqlardıń erte aldın alıwda "máhálle jetiligi" wákilleriniń tiykarǵı wazıypaları, sociallıq profilaktikanıń mazmun-mánisi hám onı nátiyjeli shólkemlestiriw jolları hár tárepleme túsindirildi. Qararda názerde tutılǵan ilajlar, "jol kartaları"nıń orınlanıwı boyınsha hár bir juwapkerdiń moynındaǵı wazıypalar jetkerildi. Búgin máhálle institutı xalıq penen mánzilli islesiw, olardıń mashqalaların sheshiw, aymaqlarda kriminogen jaǵdaydı turaqlastırıwda áhmietli buwınǵa aylanǵanın atap ótiw kerek. "Máhálle jetiligi" ushın shólkemlestirilip atırǵan oqıwlar taraw wákilleriniń bilim hám kónlikpelerin arttırıw menen birge, sistemanıń nátiyjeliligin arttırıwǵa xızmet etpekte.