«Háreketler strategiyasınan – Rawajlanıw strategiyasına qaray» principine tiykar islep shıǵılǵan 2022-2026-jıllarǵa mólsherlengen Jańa Ózbekstannıń rawajlanıw strategiyasınıń tiykarǵı jónelisleriniń birinde, mámleketimizde ádillik hám nızam ústinligi principlerin rawajlanıwdıń eń tiykarǵı hám zárúr shártine aylandırıw eń áhmiyetli wazıypalar etip belgilengen.
Sır emes, ǵárezsizligimizdiń dáslepki jıllarınan baslap-aq mámleketimizde sud hákimiyatın, onıń ǵárezsizligin bekkemlewge, sudtıń abıroyın kóteriwge, insan huqıq hám erkinliklerin isenimli qorǵawda, nızam ústinligin támiyinlew hámde demokratiyalıq reformalardı jánede tereńlestiriwde sudtıń rólin hám áhmiyetin kóteriwge qaratılǵan keń kólemli jumıslar alıp barıldı.
Ózbekstan Respublikasınıń Konstituciyasında mámleket hákimiyatınıń úsh tarmaǵı principial tárizde bir-birinen ayrıqsha ajıratılǵanlıǵı hám sudlardıń ǵárezsiz hákimiyat sıpatında aytıp ótiliwi shın mánisindegi sud hákimiyatınıń ǵárezsizligin támiyinlewge shárayat jaratadı.
Sońǵı jıllarda sud-huqıq tarawın demokratlastırıw hám erkinlestiriw, sud hákimiyatın puqaralardıń huqıqları hám nızamlı máplerin qorǵaw barısındaǵı róli hám áhmiyetin asırıw boyınsha bir qatar reformalar ámelge asırıldı.
Ózbekstan Respublikası Prezidentiniń 2020-jıl 24-iyul kúngi «Sudlar iskerligin jánede jetilistiriw hám ádil sudlaw nátiyjeliligin asırıwǵa baylanıslı qosımsha is-ilajlar haqqında»ǵı Pármanı mámleketimizde sud-huqıq reformalarınıń jańa dáwirine huqıqıy tiykar saldı.
Prezident Pármanında nızam ústinligin támiyinlew, insan huqıq hám máplerin isenimli qorǵaw, mámleket hákimiyatınıń áhmiyetli tarmaǵı bolǵan sud-huqıq sistemasın demokratlastırıw hám erkinlestiriw, mámleketimizde ámelge asırılıp atırǵan huqıqıy mámleketti qáliplestiriw hám modernizaciyalaw boyınsha uzaq múddetli hám izshil reformalar eń áhmiyetli jónelisler sıpatında belgilengeni, onıń áhmiyeti qanday dárejede ekenligin de kórsetedi. Eń áhmiyetlisi, sud-huqıq sistemasın reformalaw, onıń túp tiykarında bolsa, insan huqıqların támiyinlew máseleleri mámleket basshısınıń barqulla itibarında desek qátelespegen bolamız.
Sonday-aq keleshekte sudyalıq lawazımın iyelew ushın belgili is stajına iye bolıw, Sudyalar joqarǵı mektebin oqıp tamamlaw sıyaqlı talaplar qoyıw arqalı tanlaw kúsheyttirilgenligi hám onıń unamlı tárepleri itibarǵa alınıp, xalıq aralıq standartlardı keńnen en jaydırıw boyınsha wazıypalar belgilendi.
Joqarıdaǵılardan kelip shıǵıp aytıw múmkin, mámleketimizde Ádil sudlawdı támiyinlewge tek ǵana sud hákimiyatınıń ózi alıp baratuǵın xızmeti jeterli bolmaydı. Ásirese, adamlarımızdı ádillikke bolǵan isenimin bekkemlew, sonday-aq, «Sud imáratına kelgen hár bir insan mámleketimizde ádillik bar ekenligine isenip shıǵıwı kerek» degen Prezident talabın orınlaw – mámleketimizdiń pútkil bir sud-huqıq sistemasına birdey baylanıslı boladı.  

M.KOJAMBERGENOV
jınayat isleri boyınsha
Nókis qalası sudınıń arxiv meńgeriwshisi