Qádiriyatlarıń máńgi bolsın, Nawrız! súreni astında Qaraqalpaqstan Respublikası Ishki isler ministrliginde Nawrız bayramı ilajı ótkerildi
Xalqımız hár jılı
asıǵıslıq penen kútetuǵın shıǵıs xalıqlarınıń jańa jıl bası bolǵan Nawrız bıyıl
da ana diyarımızǵa qutlı qádemin qoydı. Tábiyat jańalanıwınıń nıshanı, jańa kún
elshisi bolǵan ulıstıń ullı kúni Respublikamızdıӊ barlıq aymaqlarında keń túrde
belgilenip, bayram tamashaları, xalıq seyilleri dawam etpekte. Qaraqalpaqstan
Respublikası Ishki isler ministrligi jámááti de Nawrız ulıwmaxalıqlıq bayramın
kóteriӊki ruxta belgilep ótti. «Qádiriyatlarıń máńgi bolsın, Nawrız!» súreni
menen shólkemlestirilgen bayram ilajında Respublikamızǵa belgili qosıqshılar
hám ministrliktiӊ Aral juldızları ansambili tárepinen bayramǵa baǵıshlanǵan
koncert baǵdarlaması, milliylikti
sáwlelendiriwshi saxnalastırılǵan bayram tamashaları usınılıp, ilaj
qatnasıwshılarına ayrıqsha zawıq baǵıshladı. Nawrız bayramı milliy sport oyınların ózinde
jámlegenligi menen de áhmietli sanaladı. Sol sıyaqlı bayram ilajı dawamında
milliy gúres, tas kóteriw hám arqan tartısıw sıyaqlı milliy sport túrlerinen
jarıslar shólkemlestirildi. Haqıyqatında da Nawrız – xalqımızdıń eski tariyxı, bay mádeniyatı hám
biybaha qádiriyatların ózinde jámlegen tınıshlıq, tatıwlıq hám abadanlıq bayramı.
Ol elimizde jasap atırǵan barlıq milletler, xalıqlar ushın birdey súyikli hám
eń qádirli bayramlarınıń biri. Sonlıqtan da xalqımız «Hár kúnimiz Nawrız
bolsın!» dep bir-birewge jaqsı tilek bildiredi.
