Usı jıldıń 11-sentyabr kúni Berdaq atındaǵı Qaraqalpaq mámleketlik universiteti hám Qaraqalpaqstan medicina institutı arasında jaslar tárbiyası, olardıń huqıqıy sanası hám dúnyaǵa kózqarasın jáne de joqarılatıw maqsetinde áhmiyetli qádem taslandı. Bul eki joqarı bilimlendiriw mákemesiniń "Qalqan" toparları arasında birge islesiw memorandumına qol qoyıldı. Ilajǵa eki joqarı oqıw orınlarınıń profilaktika inspektorları, Jaslar awqamı baslanǵısh shólkeminiń jetekshileri hám "Qalqan" toparlarınıń aǵzaları qatnastı. Ushırasıwda jaslar menen islesiw nátiyjeliligin arttırıw, olardı hár qıylı unamsız aǵımlardan saqlaw, huqıqbuzarlıqlardıń aldın alıw, sonday-aq, óz-ara birge islesiw arqalı tájiriybe almasıwdıń áhmiyeti ayrıqsha atap ótildi. Memorandumdı dúziwden tiykarǵı maqset - eki joqarı bilimlendiriw mákemesinde jumıs alıp barıp atırǵan "Qalqan" toparlarınıń aǵzaları arasında tıǵız baylanıslardı bekkemlew, profilaktika tarawında tájiriybe arttırıw hám onı ámeliyatta qollanıw bolıp tabıladı. Sonday-aq, memorandum jaslar arasında salamat ortalıqtı qáliplestiriw, olardıń sociallıq belsendiligin arttırıw, huqıqıy bilimlerin keńeytiw jolında jańa imkaniyatlar esigin ashadı. Ilaj juwmaǵında tárepler óz-ara pikir alısıp, keleshekte turaqlı túrde qospa ilajlar, dógerek sáwbetleri hám aǵartıwshılıq ushırasıwların shólkemlestiriw, jaslar arasında profilaktikalıq úgit-násiyatlaw jumısların kúsheytiwge kelisip aldı. Bul memorandum tek ǵana eki joqarı oqıw ornınıń "Qalqan" toparları ushın emes, al pútkil student-jaslar ushın da ámeliy áhmiyetke iye bolıp, olar arasında huqıqıy mádeniyattı arttırıw, birge islesiw kónlikpelerin qáliplestiriwge xızmet etedi.