Ózbekstan Respublikası Prezidenti janında 2025-jıl 8-iyul kúni Ishki isler ministri hám Bas prokurordıń prezentaciyası hám 2025-jıl 9-iyul kúni ótkerilgen videoselektor májilisinde berilgen tapsırmalardıń orınlanıwın nátiyjeli shólkemlestiriw boyınsha islep shıǵılǵan Jol kartası tiykarında, IIM Akademiyasınıń professor oqıtıwshıları tárepinen Qaraqalpaqstan Respublikasınıń Nókis qalasındaǵı kriminogen jaǵdayı awır bolǵan jámi 5 Xalıqlar doslıǵı, Jeke terek, Góne qala, Jańa bazar hám Ǵarezsizlik MPJ aymaqları úyrenilmekte. Úyreniwler dawamında, usı máhállelerde keleshekte qáwipsiz ortalıqtı jaratıw hám puqaralardıń tınıshlıǵın támiyinlew maqsetinde, jol kartaları islep shıǵılıp, onda kriminogen jaǵdayǵa unamsız tásir etetuǵın awır kategoriyadaǵı shaxslar (jumıs ornı támiyinlenbegen, spirtli ishimlikler, náshebentlik quralları, psixotrop yamasa insan aqılı-iradesine tásir etetuǵın basqa da elementlerge qaram bolıp qalǵan shaxslar, qumar hám táwekelshilikke tiykarlanǵan hám basqa da oyınlarǵa ruwxlanǵan shaxslar hám t.b.) dizimleri qáliplestirilip, bul kategoriyadaǵı shaxslardıń jaǵdayın jaqsılaw jáne máhálle aymaǵında júz bergen aldawshılıq, biyzarılıq, urlıq, shańaraq sheńberindegi jınayatlardıń erte aldın alıw boyınsha ilimiy tiykarlanǵan ilajlar islep shıǵılmaqta. Bunnan tısqarı, usı máhálle aymaqlarındaǵı "jınayat oshaqları" bolǵan orınlar da úyrenilip, bul orınlardıń kamera qadaǵalawı menen qamtıp alınǵanlıǵı, táshwish túymeleri ornatılǵanlıǵı, kóp qabatlı turaq jaylardıń domofonlar menen támiyinlengenlik dárejesi anıqlanıp, keleshekte bul baǵdarlarda da kemshiliklerdi tolıq saplastırıw, máhállelerde "qáwipsiz kóshe," "qáwipsiz jollar"dı shólkemlestiriw boyınsha da ilimiy tiykarlanǵan ilajlar islep shıǵıw rejelestirilgen.