Qaraqalpaqstan Respublikası Ishki isler ministriniń birinshi orınbasarı basshılıǵında Nókis qalasında júz bergen jınayatlar dodalandı
Sońǵı waqıtta Nókis qalasında jas óspirimler qatnasında júz bergen jınayatlardıń
kelip shıǵıw sebepleri hám aldaǵı waqıtlarda bunday unamsız jaǵdaylardıń aldın
alıwǵa baǵıshlanıp Nókis qalası hákimliginde májilis ótkerildi. Májiliske
Qaraqalpaqstan Respublikası Ishki isler ministriniń birinshi orınbasarı, Nókis
qalası prokurorı hám tiyisli mekeme shólkem basshıları, Ishki isler organları
xızmetkerleri, sonday-aq, Nókis kalası Xalıq bilimlendiriw bólimine qaraslı
mekteplerdiń juwapker wákilleri qatnastı. Ilajda atap ótilgenindey, ayrım
aymaqlarda máhálle jetiligi tárepinen huqıqbuzarlıq hám jınayatshılıqlardıń
aldın alıw baǵdarında jumıslardı durıs shólkemlestirilmegenligi awır aqıbetli
jınayatlardıń júz beriwine sebep bolmaqta. Sonlıqtan da májiliste mákan puqaralar
jıyınları wákilleri hám birge islesiwshi uyımlardıń xızmetkerlerine júz bergen
jaǵdaylardan durıs juwmaq shıǵarıp aldaǵı waqıtlarda bunday jınayatlardıń aldın
alıw baǵdarındaǵı jumıslardı kúsheytiw kerek ekenligi atap ótildi. Ilaj sońında
aldaǵı waqıtlarda huqıqbuzarlıq hám jınayatshılıqlardıń, sonıń menen birge
basqa da ayrıqsha jaǵdaylardıń aldın alıw boyınsha jıynalǵan juwapker
xızmetkerlerge wazıypalar belgilep berildi.
