Nókis rayonında jol háreketi qáwipsizligi boyınsha kóshpeli qabıllaw ótkerildi
Nókis rayonı jollarında júzege kelip atırǵan tıǵılıslardı saplastırıw, jol-transport hádiyseleriniń aldın alıw hám puqaralardıń usınıs hám múrájatların úyreniw maqsetinde gezektegi kóshpeli qabıllaw shólkemlestirildi. Kóshpeli qabıllaw dawamında xalıq tárepinen mektepler janında tezlikti sheklewshi belgilerdi ornatıw, zárúr jol belgileri ornatıw, jergilikli jollardaǵı tártipke salınbaǵan piyadalar ótiw orınlarına kóterilgen piyadalar jolların qurıw sıyaqlı bir qatar áhmietli usınıs hám múrájatlar bildirildi. Qabıllawda bildirilgen múrájatlardıń kópshiligine ornında huqıqıy hám ámeliy sheshimler tabıldı. Múddet talap etetuǵın máseleler bolsa juwapkerlerdiń qadaǵalawına alınıp, tiyisli shólkemlerdiń basshılarına anıq tapsırmalar berildi. Kóshpeli qabıllawlardı ótkeriwden tiykarǵı maqset - jol háreketi qatnasıwshıları ushın qáwipsiz hám qolaylı sharayatlar jaratıwdan ibarat.
