Nókis “Temurbeklar mektebi” áskeriy-akademikalıq liceyi Ájiniyaz Qosıbay ulı tuwılǵanına 200 jıl tolıw múnásebeti menen ilaj ótkerildi
“Ataqlı qaraqalpaq shayırı hám oyshılı Ájiniyaz Qosıbay ulı tuwılǵanına 200 jıl tolıw múnásebeti menen Nókis “Temurbeklar mektebi” áskeriy-akademikalıq liceyi oqıwshıları menen Ájiniyaz atındaǵı Nókis Mámleketlik Pedagogikalıq Institutı oqıtıwshısı, filologiya ilimleri boyınsha filosofiya doktorı (PhD) Qoshqarbay Matimov penen ushırasıw shólkemlestirildi. Ushırasıwda qaraqalpaq xalqınıń ullı shayırı Ájiniyaz Qosıbay ulınıń ɵmiri, shıǵarmalarınıń tek ǵana qaraqalpaq ádebiyatı, bálki ózbek, qazaq, túrk hám basqa turkiy xalıqlar ádebiyatında tutqan ornı, XIX ásirdegi qaraqalpaq ádebiyatındaǵı áhmiyeti, búgingi kúnde onıń dóretpeleri úyreniliwi hám keleshek áwladlarǵa jetiwi múmkin bolǵan tariyxıy máselelerge arnalǵan lekciyalar oqıldı. Ájiniyaz Qosıbay ulı dúnyaǵa tereń sezimler menen kirip kelip, qaraqalpaq xalqınıń ruwxıy baylıǵına úlken úles qosqan, ádebiyatımızdı tek ǵana gúllendirip qoymastan, bálki qońsılas xalıqlarǵa da tanıtqan úlken tulǵa esaplanadı. Ol qaraqalpaq ádebiyatında lirikalıq, epikalıq poeziyanı rawajlandırıw menen bir qatarda, aytıs janrına tiykar salıwshılardıń biri bolıp tabıladı.
