Onda tiyisli ministrlikler, mámleketlik shólkemler, ishki isler uyımları hám sudyalar qatnastı. Atap ótilgenindey, oqıw-seminarınıń tiykarǵı maqseti - ámeliy sud tájiriybesi tiykarında miynet kelispewshiliklerin durıs sheshiwde juwapker shólkemler arasında birge islesiwdi kúsheytiw, jańa Miynet kodeksinde belgilengen normalardıń durıs qollanılıwın támiyinlew hám mámleketlik xızmetkerler hám xızmetkerler arasında huqıqıy sananı arttırıwdan ibarat boldı. Seminar sheńberinde Qaraqalpaqstan Respublikası sudınıń sudyaları tárepinen "Ózbekstan Respublikası Miynet kodeksinde belgilengen miynet shártnamasın jumıs beriwshiniń baslaması menen biykar etiw tártibi," "Ózbekstan Respublikası Prezidentiniń 2017-jıl 29-noyabrdegi qararı menen tastıyıqlanǵan "Ishki isler uyımlarında xızmetti ótew tártibi haqqında"ǵı Rejeniń áhmieti" atamasında bayanatlar oqıldı. Sonday-aq, miynet shártnamaların biykarlawdaǵı huqıqıy talaplar, sud ámeliyatındaǵı jumısqa tiklew jaǵdayları, ishki isler uyımlarında xızmet kórsetiw menen baylanıslı miynet qatnasıqları, xızmetkerlerdiń huqıqıy qorǵalıwın támiyinlewdiń ámeliy mexanizmleri sıyaqlı áhmietli máseleler de kórip shıǵıldı. Ilaj juwmaǵında qatnasıwshılar miynet qatnasıqları tarawındaǵı jańalıqlardıń ámeliyatqa engiziliwi boyınsha pikir alıstı. Sud ámeliyatın jetilistiriw, xızmetkerler hám jumıs beriwshiler arasındaǵı kelispewshiliklerdiń aldın alıw jáne bunday seminarlardı sistemalı túrde ótkeriw zárúr ekenligi atap ótildi.