????Búgin, 6-sentyabr kúni Qaraqalpaq filologiyası hám jurnalistika fakultetinde student-jaslar arasında huqıqıy mádeniyattı bekkemlew, huqıqbuzarlıq hám jınayatshılıqtıń aldın alıw, sonday-aq, olardı milliy qádiriyatlar hám ádep-ikramlılıq normalarına sadıqlıq ruwxında tárbiyalaw maqsetinde úgit-násiyat ilajı bolıp ótti. Ilajda fakultettiń jaslar menen islesiw boyınsha dekan orınbasarı Z.Jumanov, universitettiń hayal-qızlar máseleleri boyınsha profilaktika inspektorı K.Ataniyazova, hayal-qızlar psixologi F.Tolibaeva hám birinshi kursqa qabıl etilgen student-jaslar qatnastı.

????Ilaj dawamında studentlerge mámleketimizde jaslarǵa baylanıslı mámleketlik siyasat sheńberinde ámelge asırılıp atırǵan ilajlar, bilimlendiriw mákemelerinde tártipti bekkemlew boyınsha belgilengen wazıypalar haqqında hár tárepleme maǵlıwmat berildi. Sonıń ishinde, universitettiń ishki tártip-intizam qaǵıydaları, Ádep-ikramlılıq kodeksi, studentlerdiń huqıq hám minnetlemeleri, sonday-aq, sociallıq tarmaqlardan durıs paydalanıw, unamsız aqıbetlerge alıp keliwshi zıyanlı ádetlerden uzaq jasaw sıyaqlı temalarda tolıq túsinikler ótkerildi.

????Sonday-aq, hayal-qızlar profilaktika inspektorı K.Ataniyazova jınayatshılıq hám huqıqbuzarlıqlardıń jaslar turmısındaǵı unamsız tásiri, olardıń keleshektegi táǵdirine zıyan jetkeriwi múmkin ekenligi haqqında turmıslıq mısallar arqalı túsindirip berdi. Psixolog F.Tolibaeva bolsa student-jaslardıń psixologiyalıq mashqalaların jeńiwde járdem beriw, hár qıylı stress jaǵdayların jeńip ótiw, salamat ortalıqta bilim alıw hám ózin erkin kórsetiw imkaniyatların keńeytiw haqqında sóz etti.

????Ilaj sońında jaslar ózlerin qızıqtırǵan sorawlarǵa juwap aldı, sonday-aq, universitette jaratılǵan imkaniyatlardan únemli paydalanıw, bilim hám intellektuallıq potencialdı arttırıw, huqıqbuzarlıqlardıń aldın alıwda hár bir studenttiń jeke juwapkershiligi áhmiyetli ekenligi ayrıqsha atap ótildi.